اتعلمت وفهمت

 

بقلم : أمل الخولى

اتعلمت وفهمت :
ان في ناس بتكرهك قوى لانهم شايفين فيك حاجة احسن منهم، وبيحسدوك عليها، وجايز انت نفسك مش شايف فيك الحاجة دى.

لما مشيت بدماغى مندمتش قد ندمى لما مشيت بدماغ غيرى.

الضحكة الحلوة اللى الشخص بيقابلك بيها، مش لازم يكون اللى في قلبه حلو بردوا.

المثالية الزايدة اللى بيتكلم بيها اللى قدامك، في حالات كتيرة بتبقى كلام وبس من غير افعال.

اللى تعرض للظلم والخذلان مهما حاولت تنسييه، هيفضل فاكر ومش هيسامح بسهولة الا اذا عاش اللى اذاه نفس الاحساس.

الدخول في جدال لاثبات وجهة نظرك وانك على حق، تضيع للوقت والجهد.

على قد ما هتاخذ من كورسات تتعامل ازاى مع الناس مش هتنفع من غير ما تخوض التجربة بنفسك.

ما تحكمش على حد بناء على ما سمعته من الاخرون، احكم عليه بناء على معاملته معاك.

في صوت داخلى بيظهر لك كل شوية، بلاش تقاوح معاه جامد، عشان بيبقى صح في اوقات كتيرة.

اهلك هم سندك وضهرك، مهما اختلفتوا وبعدوا هيفضلوا هم اكتر ناس تخاف عليك.

الاهم من كل دة ان يفضل حسن الظن بالله ملازمك في كل خطواتك.